Оваа година Прво па женско го зазема своето место на подиумот на фестивалот за нова музика – Здраво Млади. На ППЖ стејџот на ЗМ овој 11 октомври ќе ги гледаме:

Katerinha 🪩 – македонска диџејка и креативна сила базирана во Берлин.
Нејзиниот звук е енергичен спој на светска клубска музика, афро хаус, гараж звук, брејкови и хаус. Katerinha е резидент на Refuge Worldwide, но и активна гостинка на Kiosk Radio, WorldwideFM, Dublab Barcelona, Cosmo ARD (поранешно Funkhaus Europa). Свој успешен настап бележи и за домашното, веќе непостоечко Amok Radio.
Основачка е на берлинскиот диџеј колектив Rafiki и често присутно име на локални и меѓународни фестивали, вклучувајќиги Womb (Токио), HKW (Берлин), Jazzmontez (Франкфурт), Hoemies (Берлин), Lunchbox Candy (Берлин), Manaki Festival (Македонија) и No Concerns Festival (Литванија).
Покрај тоа што е букерка, креативна продуцентка и кураторка, Katerinha настапува и како басистка, диџејка, гитаристка и пејачка. Нејзиниот проект за жива музика, Temkina, е соул “crossover” на ритам и блуз, џез и поп.
Сетовите на Katerinha се вистинска клубска „тренинг-сесија“ со силни перкусии, басови и јужни ритми.
——————————

Suze od luka 💙 – терапија со емотивни битови и текстови што допираат директно во сржта.
Лука Видовиќ, кој го знаеме како дел од електронското дуо Pocket palma, годинава го лансираше својот соло проект – Suze od luka и својот прв соло албум – L A G A N.
Иако влегувањето во соло водите знае да биде незгодна ситуација, Лука се снајде и плива беспрекорно! Доказ за тоа е и неговиот прв албум, кој не е само збирка песни туку и лична белешка од неговите искуства, интроспективна терапија преточена во електро битови и текстови кои гаѓаат во срце.
L A G A N е резултат на целокупниот музички вкус на Лука – од детството со Avril и Britney, преку тинејџерските денови со Linkin Park и Evanescence, па сè до дваесеттите години кога ги открива Jamie XX, James Blake и Moderat, а поново и Fred Again.
——————————

Pocket palma 💙 – “носталгијата во неонски бои”. 🌌
Pocket palma e загрепско синтвејв дуо составено од Ања Папа и Лука Видовиќ, доаѓа со својот препознатлив ретро, но истовремено и свеж звук, кој веќе освои илјадници слушатели низ регионот.
Нивниот прв албум, истоимениот „Pocket palma“, се состои од 11 песни низ кои се провлекуваат теми од нивното минато – mixtape-касети, преклопни мобилни телефони, училишни забави, скршени срца, како и задолжителните ретро мотиви: летните зајдисонца, неонските светла и неизбежните палми, спакувани во длабоки метафори за секојдневието. Токму со тој албум, “Pocket palma” отворија врата кон една сосема нова synth-поп сцена на Балканот. Со најновиот, трет студиски албум “III”, добија уште повеќе признанија и ја започнаа својата голема регионална турнеја со настапи во Хрватска, Србија, БиХ и Македонија.
А сите ние, доаѓаме за мега-хитовите „godišnji“ и „ono što nam inače nedostaje“. 🪭
——————————

Gillespie 🎶 – алтернативен рок во својата најнепредвидлива форма!
Gillespie се еден од највлијателните алтернативни состави од Приштина, кои повеќе од 20 години ја “кршат” сцената со уникатен спој на рокенрол, психоделија, нојз и инди – веднаш воочливо и во нивниот видео-сингл „Dimri shkoi“. Песната е дел од нивниот последен албум „Diku, dikur…“, кој низ 8 жестоки траки, не носи низ вистинско патешествие низ сите нијанси на рокенролот – почнувајќи од 60-ти психоделија а се до современо инди.
Хитот „E Di!“ бил број еден во Косово цели шест месеци, а „Luledielli“ била номинирана за најдобра indie песна. ЕП-то „Femme Fatale“ пак, донело уште една номинација за најдобра алтернативна песна на „Top Fest“ во Албанија. Gillespie се познати и по својата активна поддршка за човекови права и здрава животна средина.
Gillespie зад себе имаат три фантастични албуми и едно EP, а бендот го сочинуваат:
Blerta Zabergja – вокал
Guri Shkodra – гитара, клавијатури
Isah Mustafa – бас и бек вокали
Granit Havolli – тапани
Viola Rrecaj – клавијатури
——————————

КЕМ 🎸 – сите сме КЕМ!
КЕМ e музички колектив од Скопје, формирани 2020 година. Во својот израз комбинираат хип-хоп, инди, RnB, семплови од авторска гитара и синтисајзер спакувани во нео соул пикник-мелодија.
Нивниот прв албум, насловен “Columba Noachi”, веќе достигна своевиден етаблиран статус на алтернативната сцена. Во живо, настапите на КЕМ имплодираат од интимна енергија која е во постојана динамична релација бенд – публика – бенд. Секојпат се трудат да звучат различно, затоа што сакаат да си “поиграат” со она што го снимиле, оставајќи простор публиката да ги доживее одново.
По нивното првенче, издадоа сингл со наслов “Завист”, а снимија и live – сесија за музичката платформа Xotel. Во 2024 година го издадоа и својот втор албум „Камен Пламен Татко“.
А од најново, КЕМ се:
Емир Јашаров
Марко Марковски
Марко Захариев
Емил Ејупи
и
Елена Васова
„Само надежта ни го држи духот силен“ – велат тие. A време е за Ghostbusters! 👻
——————————

Lelee 💥 – трансбалканскo инди рок трио кое бргу стана еден од најважните гласови на регионалната алтернативна сцена!
Со својот свеж, разигран и хармоничен звук, во кој се спојуваат југословенското наследство на новиот бран од 80-тите, “slacker” вибрациите од 90-тите и јадранскиот темперамент, тие создаваат музика што веднаш остава трага. По одлично прифатениот деби албум “Čuka bije pumpa” (2021), кој ги однесе на турнеи низ Балканот и пошироко, Lelee се враќаат со новото издание “Mora malo u crveno” (Moonlee Records, 2024) – уште една доза оригинална музика со заразна “feel-good” енергија за тело и дух.
Нивните песни, полни со елан и искреност, се препознатливи по моќниte рефрени и мелодии. Во живо, со нивниот заразен “joie de vivre” пристап, неприкосновена искреност и колективен ентузијазам, Lelee тврдоглаво стојат наспроти мрачниот дух на денешницата. Тие ќе ве ќе ве транспортираат надвор од границите на можното, надвор од комфор зоната, за заедничко надминување на сите самонаметнати ментални бариери.
Членови:
Дамјан Маневски (гитара, вокал)
Јелена Рушјан (бас, вокал)
Миха Конрад (бубњеви)
********************
Се гледаме на 11 октомври во МКЦ!