„Години будни“ е книга посветена на првите десет години од ПРВО ПА ЖЕНСКО – фестивалот што го сакаме. Taa не е дефинитивен, финален документ, туку критичко, асоцијативно, пријателско и, на моменти, носталгично осврнување на првите десет години на ППЖ, во кое збор земаат неговиот тим, соработничките и соработниците, пријателите и поддржувачите, од локалната сцена и од регионот.
***
Уредничка: Марија Христова
Марија Христова (р. 1985, Скопје, Северна Македонија) е уредничка и културна работничка, со-основачка на PrivatePrint, независно издавачко и кураторско студио од Скопје. Дипломира на катедрата за Италијански јазик и книжевност на Филолошкиот факултет „Блаже Конески“, во Скопје, во 2009 година, а во 2013 магистрира на Интердисциплинарните културолошки студии на Институтот за македонска литература во Скопје. Нејзиното работно искуство во рамките на PrivatePrint или во надворешни соработки, подразбира уредничка и авторска работа во разновидни издавачки, уметнички и интердисциплинарни проекти и секојдневно вклучува аспекти од културен менаџмент и организација до замисла и авторство. Таа силно верува дека соработничкиот и интердисциплинарниот пристап во креативната практика се основа за општествено ангажирана работа што се стреми да поттикне промена и релевантност.
***
Промоторка: Калиа Димитрова
Калиа Димитрова (1991) е писателка, активистка и феминистка од Скопје. Има диплома за политички науки на Правниот факултет Јустинијан Први на Универзитетот „Св. Кирил и Методиј “во Скопје. Магистерските студии во областа на културните студии ја донесоа во Холандија, Полска и САД, каде студираше и живееше до 2017 година, пред да се врати во Скопје. Во 2018 година ја издава својата прва книга „Вештерките денес“ и станува дел од тимот на Фестивалот ПРВО ПА ЖЕНСКО. Работи во Хелсиншкиот комитет за човекови права – Скопје, фокусиран на родот и ЛГБТИ правата. Основачка е и главна уредничка на првата феминистичка платформа на македонски јазик – Медуза www.meduza.mk. Кога одвојува време, пишува есеи и поезија.


