На 18 февруари, во просториите на Младинскиот центар „Матично“, Тиииит! Инк. го одржа својот Отворен ден, на кој присуствуваа околу 20 учесници и учеснички заинтересирани за вклучување во програмските активности на организацијата.

Настанот беше замислен како простор за запознавање со тековната работа и плановите за 2026 година, при што тимот на Тиииит! Инк. ги претстави програмските линии, тековните иницијативи и можностите за ангажман. Учесниците имаа можност да се претстават и да посочат во кои области и програми се препознаваат, отворајќи простор за понатамошна соработка.

Атмосферата беше интерактивна и отворена, со активна размена на интереси и мотивации за вклучување. Како резултат, дел од присутните изразија интерес за волонтерско или соработничко учество во различни сегменти од работата на организацијата, вклучително и: финансии и администрација, комуникации (социјални мрежи), поддршка на веб страната, креирање содржини, како и програмски активности како што се Изведувачка, Визуелна, Филмска и QUEER програма, Летната школа за феминистичко драматуршко размислување, Школата за феминистичко курирање, Школата за DJ-ки, феминистички стенд-ап, издавачката едиција Vagina Dentata, иницијативите за менструална правда и женски кооперативи, како и учество во Собранието и организацијата на Протестот за 8-ми март.

Отворениот ден претставува важен чекор во градењето на заедницата околу Тиииит! Инк., како и во отворањето на нови можности за вклучување, учење и заедничко дејствување.
———–
Отворениот ден на Тиииит! Инк. е активност поддржана во рамки на проектот „Култура за развој“ на Владата на Швајцарија, кој се имплементира од Хартефакт Фонд.

