Овој панел има за цел да ја отвори за дискусија и промислување комплексната, динамична и, честопати контрадикторна позиција на родовата и сексуалната еманципација во рамки на социјалистичка Југославија. За разлика од националистички ориентираната историографија на ревизионизам, и нејзиното неправедно хомогенизирање на комплексноста на југословенското наследство под капата на титоистичкиот тоталитаризам, историјата на родовата и сексуалната еднаквост во Југославија треба да биде промислена одново преку посуптилен, внимателен, критички и историски сензитивен пристап, без притоа одговорот да биде вметнат во рамка на контра-ревизионистички тенденции на монументализација или романтизација на социјалистичкото историско наследство. Одовде, и овој панел стреми да ги донесе во преден план како еманципаторските потенцијали, така и патријархалните блокади, во третманот на родовата и сексуалната еднаквост во социјалистичка Југославија, да го преиспита нивното значење за колективната меморија, и да ги истражи можностите што различните критички и еманципаторски практики за родот и сексуалноста во Југославија ги отвораат за нашето современо обмислување и политичко дејствување во насока на родова и сексуална еманципација.

Учесници: Франко Дота, Ивана Пантелиќ и Тијана Окиќ

Модератор: Славчо Димитров